ᐊᖏᔪᖅᑳᖑᔪᓄᑦ
Literacy at home | Math at home ᐊᖏᕐᕋᒥ ᑎᑎᖅᑭᕆᔾᔪᑎᑦ | Community Safety ᓄᓇᓕᖕᓂ ᐊᑦᑕᕐᓇᖅᑕᐃᓕᒪᓂᖅ | More resources ᐱᓕᕆᐊᒃᓴᒃᑲᓐᓂᑦ
ᐅᑲᓕᖅ ᑲᓪᓚᓪᓗ ᐃᓕᓐᓂᐊᕈᑎ ᓱᕈᓯᓛᓄᑦ ᑕᕐᕆᔮᒃᓴᐅᓪᓗᑎᒃ ᑭᖑᓕᕇᑦ ᓱᕈᓯᕐᓂᒃ ᐱᕙᒌᔭᐃᓇᓱᐊᕈᑦ ᐃᓕᓐᓂᐊᕆᐊᕆᐅᕐᓂᒃᓴᖏᓐᓄᑦ ᓴᖅᑭᔮᖅᑎᑦᑎᔪᖅ ᑎᑎᖅᑭᕆᓂᕐᒥᒃ, ᓈᓴᐅᓯᕆᔪᓐᓇᖅᓯᓂᕐᒥᒃ, ᐃᓅᖃᑎᖃᕈᓐᓇᕐᓂᕐᒥᒡᓗ.
ᑕᕝᕙᓂ ᒪᒃᐱᒐᕐᒥ, ᐊᖏᔪᖅᑳᖑᓪᓗᑎᑦ, ᐸᖅᑭᔨᐅᓪᓗᑎᑦ, ᐃᓕᓴᐃᔨᐅᓪᓗᑎᓪᓘᓐᓃᑦ ᓇᓂᓯᓂᐊᖅᐳᑎᑦ ᐸᕐᓇᐅᑎᓂᒃ, ᐅᖃᓕᒫᕆᐅᖅᓴᐅᑎᐅᔪᓐᓇᕐᓂᐊᖅᑐᓂᒃ, ᑎᑎᕋᕆᐅᖅᓴᔾᔪᑎᓂᒃ, ᓈᓴᐅᓯᕆᓂᕐᒥᒡᓗ. ᓇᓂᓯᓂᐊᕆᕗᑎᑦ ᐊᑭᓐᓇᕐᒥᐅᑕᓂᒃ ᓴᖅᑭᑦᑐᓐᓇᖅᑕᕐᓂᒃ ᓄᓇᓕᖕᓂ ᐊᑦᑕᕐᓇᖅᑐᒦᑦᑕᐃᓕᔾᔪᑎᒃᓴᓂᒃ, ᐊᓯᖏᓐᓄᓪᓗ ᐃᓕᓐᓂᐊᕈᑎᓄᑦ ᐃᑭᐊᖅᑭᕕᔾᔪᑎᓂᒃ ᑐᖅᑯᕋᒃᓴᓂᒡᓗ.
ᑎᑎᖅᑭᕆᒋᐅᖅᐸᓪᓕᐊᓂᖅ ᐊᖏᕐᕋᒥ
ᐊᖏᕐᕋᒥ ᓴᖅᑭᔮᖅᑎᑦᑎᖃᑦᑕᕐᓂᖅ ᑎᑎᖅᑭᕆᒋᐅᖅᓴᐅᑎᓂᒃ ᐱᔭᕆᐊᑐᖖᒋᓚᖅ.
ᐅᑯᐊ ᒪᓕᒃᑯᕕᒋᑦ:
ᑎᑎᖅᑭᕆᓂᕐᒥᒃ ᓴᖅᑭᔮᖅᑎᑦᑎᓂᖅ.
- ᓱᕈᓰᑦ ᑕᑯᑎᓪᓗᒍ ᐅᖃᓕᒫᒐᐃᑦ ᐊᑑᑎᖃᕐᓂᖏᓐᓂᒃ ᐃᓪᓗᔅᓯᓐᓂ ᓴᓂᕐᕙᐃᓗᑎᑦ ᐅᖃᓕᒫᒐᒃᑯᕕᖕᓂᒃ.
- ᖃᐅᑕᒫᑦ ᐅᖃᓕᒫᖃᑦᑕᕐᓗᑎᑦ. ᕿᑐᕐᖓᕐᓂ ᐅᖃᓕᒫᖃᑎᖃᖃᑦᑕᕈᕕᑦ ᐊᑕᐅᑦᑎᒃᑯᑦ ᑕᕝᕙᓂᑦᓴᐃᓐᓇ ᓯᕿᖖᒍᔭᖅ ᓇᓪᓕᕌᖓᑦ ᑕᑯᒃᓴᐅᑎᑦᑎᓂᐊᖅᑐᖅ ᐅᖃᓕᒫᕐᓂᐅᑉ ᐱᒻᒪᕆᐅᓂᖓᓂᒃ.
- ᓇᓂᓯᓗᑎᑦ ᓂᐱᑭᑦᑐᒥᒃ ᐊᑲᕐᕆᓇᖅᑐᒥᒃ ᐅᖃᓕᒫᕕᒋᖃᑦᑕᕐᓂᐊᖅᑕᕐᓂᒃ ᕿᑐᕐᖓᓄᑦ. ᐅᓚᕕᔅᓯᔪᓐᓇᖅᑐᑦ ᖃᔅᓰᓐᓇᐅᑎᒋᐊᕐᓗᒋᑦ ᑕᓚᕖᓴ, ᓈᓚᐅᑎ, ᐊᓯᖏᓪᓗ ᐅᐊᔭᒨᖅᑐᑦ, ᓄᖅᑲᖅᑎᓪᓗᒋᓪᓗ ᖃᕋᓴᐅᔭᒃᑰᖅᑐᑦ ᐅᖃᓕᒫᖅᑎᓪᓗᑎᑦ ᓴᖅᑭᑲᐃᓐᓇᓲᑦ.
- ᕿᑐᕐᖓᐃᑦ ᑕᑯᑎᑉᐸᓪᓗᒍ ᐅᖃᓕᒫᖅᑎᓪᓗᑎᑦ ᑎᑎᕋᖅᑎᓪᓗᑎᓪᓗ. ᓱᕈᑦᑎᑦ ᖃᐅᔨᔪᒪᐃᓐᓇᓲᖑᒻᒪᑕ ᐃᓐᓇᐃᑦ ᐱᓕᕆᐊᖏᓐᓂᒃ. ᕿᑐᕐᖓᐃᑦ ᑕᑯᕙᒃᐸᑦ ᐅᖃᓕᒫᖅᑎᓪᓗᑎᑦ ᑎᑎᕋᖅᑎᓪᓗᑎᓪᓗ, ᖃᐅᔨᔪᒪᓕᑐᐃᓐᓇᕆᐊᖃᕐᒪᑕ ᐅᖃᓕᒫᕐᓂᕐᒥᒃ ᑎᑎᕋᕐᓂᕐᒥᒡᓗ!
- ᕿᑐᕐᖓᐃᑦ ᐅᖃᓪᓚᖃᑎᒋᕙᓪᓗᒍ ᐃᒡᓗᒥ ᐱᓕᕆᑎᓪᓗᑎᑦ, ᓄᓇᓕᒃᑯᑦ ᐱᓱᒃᑎᓪᓗᓯ, ᓂᕆᑎᓪᓗᓯᓗ. ᐅᖃᓪᓚᖃᑎᖃᖃᑦᑕᕐᓂᖅ ᖃᓄᑐᐃᓐᓇᖅ ᑐᓴᖅᑎᑦᑎᓲᖑᒻᒪᑦ ᐊᔾᔨᒌᖖᒋᑦᑐᓂᒃ ᐅᖃᐅᓯᕐᓂᒃ.
- ᕿᑐᕐᖓᐃᑦ ᐅᓂᒃᑳᕐᕕᒋᕙᓪᓗᒍ ᐅᓂᒃᑳᖅᑎᑉᐸᓪᓗᒍᓗ ᐃᓕᖕᓄᑦ.
- ᕿᑐᕐᖓᐃᑦ ᐊᒥᐊᕆᔪᓐᓇᕐᕕᖃᖅᑎᑉᐸᓪᓗᒍ, ᑎᑎᖅᑐᒐᕐᓗᓂ, ᒥᖑᐊᕆᓗᓂᓗ. ᑕᐃᒪᐃᓕᐅᕈᓐᓇᖅᓯᑉᐸᑦ, ᐱᕙᒌᔭᖅᓯᒪᓂᖅᓴᐅᒐᔭᖅᑐᖅ ᐃᓕᓐᓂᐊᕆᐊᕈᓂ. ᑕᑯᑎᑉᐸᓪᓗᒍ ᐅᖃᓕᒫᒐᐃᑦ ᐊᑑᑎᖃᕐᓂᖏᓐᓂᒃ ᓴᓂᕐᕙᐃᒍᕕᑦ ᐅᖃᓕᒫᒐᖃᕐᕕᖕᓂᒃ.
ᐅᖃᓕᒫᕐᓂᖅ ᖁᕕᐊᓇᖅᑎᓪᓗᒍ!
- ᕿᑐᕐᖓᐃᑦ ᐅᖃᓕᒫᕕᒋᕙᓪᓗᒍ ᓂᐲᑦ ᐊᓯᔾᔨᖅᑕᖅᑎᓪᓗᒍ ᐃᓄᖖᒍᐊᖏᓪᓗ ᓂᐱᖃᖅᑎᖖᒍᐊᕐᓗᒋᑦ ᐊᔾᔨᒌᖖᒋᑦᑐᓂᒃ ᐅᓂᒃᑳᕐᓘᓐᓃᑦ.
- ᐅᖃᓕᒫᖅᑎᓪᓗᑎᑦ, ᐅᖃᓪᓚᐅᓯᕆᔪᓐᓇᕐᒥᔭᑎᑦ ᐊᔾᔨᖖᒍᐊᖏᑦ ᐅᖃᐅᓯᖅᑕᖏᓪᓘᓐᓃᑦ. ᐊᐱᕆᕙᒻᒥᓗᒋᑦ ᓱᔪᖃᖖᒍᐊᕐᓂᐊᖅᑐᒋᒻᒪᖔᒍ (ᓲᕐᓗ., “ᓇᓄᖅ ᐅᑎᖖᒍᐊᕐᓂᐊᖅᑐᕆᕕᐅᒃ?”) ᑐᓴᖅᑕᖏᑕᓗ ᒥᒃᓵᓄᑦ ᐅᓂᒃᑳᕐᒥ.
- ᕿᑐᕐᖓᐃᑦ ᐅᓂᒃᑳᕐᒧᑦ ᐱᖃᓯᐅᑎᑎᓐᓇᓱᒃᐸᓪᓗᒍ ᐅᖃᐅᓯᕐᓂᒃ ᑎᒃᑯᐊᖅᓯᖁᕙᓪᓗᒍ ᑭᓱᖖᒍᐊᓂᒡᓗ ᖃᐅᔨᔪᒥᓇᖅᑐᓂᒃ.
- ᐊᔪᕆᖅᓲᑎᓗᒍ ᐅᖃᓕᒫᒐᕐᒧᑦ ᐊᔾᔨᐅᑎᑦᑐᓐᓇᕐᓂᖓᓂᒃ. ᓲᕐᓗ, ᐅᖃᓕᒫᒐᖅ ᐆᒪᔪᖖᒍᐊᖃᖅᐸᑦ, ᐅᓂᒃᑳᕐᓗᑎᑦ ᐊᑐᓚᐅᖅᓯᒪᔭᕐᓂᒃ ᐆᒪᔪᖃᖅᑐᒥᒃ ᑕᐃᒪᐃᑦᑐᒥᒃ.
- ᐅᖃᓕᒫᓕᖅᑭᑉᐸᓪᓗᒋᑦ ᕿᑐᕐᖓᖅᐱᑦ ᐅᖃᓕᒫᒐᑦᑎᐊᕙᐅᒋᔭᖏᑦ. ᐃᑲᔫᑎᖃᕐᓂᐊᖅᑐᖅ ᐅᖃᐅᓯᕐᓂᒃ ᐃᓕᑦᑎᕙᓪᓕᐊᓂᕐᒥᒃ ᐅᖃᓕᒫᒐᕐᒥᒡᓗ ᖃᐅᔨᒪᓕᕐᓗᓂ.
- ᕿᑐᕐᖓᐃᑦ ᖃᐅᔨᒪᓕᖅᐸᑦ ᐅᖃᓕᒫᒐᕐᒥ, “ᐅᖃᓕᒫᖅᑎᓐᓇᓱᒃᐸᓪᓗᒍ” ᐃᓕᖕᓄᑦ, ᐊᔾᔨᖖᒍᐊᖏᓐᓂᒃ ᐊᑐᐊᕐᓗᓂ.
- ᕿᑐᕐᖓᐃᑦ ᓂᕈᐊᖅᑎᑉᐸᓪᓗᒍ ᐅᖃᓕᒫᒐᕐᒥᒃ ᐅᖃᕈᓐᓇᖅᑎᑉᐸᓪᓗᒍ ᖃᓄᖅ ᐅᖃᓕᒫᒐᖅ ᐃᓱᒪᒋᒻᒪᖔᒍ ᖃᓄᐃᑦᑐᓂᒃ ᐅᖃᓕᒪᕈᔾᔭᐅᖃᑦᑕᕆᐊᒃᓴᖅ ᖁᕕᐊᒋᒻᒪᖔᒍ.
- ᐊᒡᒐᓄᑦ ᐊᐅᓚᑕᒐᓕᐅᖃᑎᒋᓗᒍ ᐅᓂᒃᑳᕐᒥ ᐃᔾᔪᐊᖅᓯᔪᓐᓇᖅᓯᓂᐊᕐᒪᑦ ᓱᔭᐅᖖᒍᐊᖅᑐᓂᒃ ᐅᖃᓕᒫᒐᕐᓂ ᑐᓴᐅᒪᓕᖅᑕᖏᓐᓂᒃ.
ᑎᑎᖅᑲᓂᒃ ᐅᔾᔨᕈᓱᓕᕐᓂᖅ.
- ᑎᒃᑯᐊᖅᓯᕙᓪᓗᑎᑦ ᐊᖏᕐᕋᒥ ᑎᑎᖅᑲᓂᒃ ᐊᔾᔨᒌᖖᒋᑦᑐᓂᒃ. ᐃᓚᒋᔪᓐᓇᖅᑕᖏᑦ ᓂᕿᓃᑦᑐᑦ ᑎᑎᖅᑲᑦ ᓲᕐᓗ ᐅᓪᓛᖅᓯᐅᑎᓂᒃ ᐃᒻᒧᖃᐅᑎᓂᒡᓘᓐᓃᑦ.
- ᐊᑎᖏᓐᓂᒃ ᐋᖅᑭᒃᓯᕕᒋᕙᓪᓗᒋᑦ ᐊᖏᕐᕋᒥ ᓇᓂᔭᐅᔪᓐᓇᖅᑐᑦ, ᓲᕐᓗ ᓴᓂᒃᑯᕕᒃ, ᒪᑐ, ᐃᒃᓯᕙᐅᑕᖅ. ᑎᒃᑯᖅᑑᑎᕙᓪᓗᒍ ᕿᑐᕐᖓᐃᑦ ᐊᑎᖏᑦ ᐅᖃᓕᒫᕐᓗᒋᓪᓗ.
- ᓄᓇᓕᒃᑰᖅᑎᓪᓗᓯᒃ, ᕿᑐᕐᖓᐃᑦ ᑎᒃᑯᖅᑑᑎᕙᒻᒥᓗᒍ ᑎᑎᕋᖅᓯᒪᔪᓂᒃ ᓲᕐᓗ ᐊᖅᑯᑏᑦ ᐊᑎᖏᓐᓂᒃ, ᐊᖅᑯᑎᒃᑰᕈᓐᓇᐅᑎᓂᒃ, ᐃᒡᓗᐃᓪᓗ ᐊᑎᖏᓐᓂᒃ.
- ᐃᓛᓐᓂᒃᑯᓪᓗ, ᐅᖃᐅᓰᑦ ᐅᖃᓕᒫᒐᕐᒦᑦᑐᑦ ᑐᒃᑯᐊᖅᐸᒻᒥᓗᒋᑦ ᐅᖃᓕᒫᖅᑎᓪᓗᑎᑦ. ᑕᑯᑎᑦᑎᓂᐊᖅᑐᖅ ᕿᑐᕐᖓᕐᓂ ᐅᖃᖅᑕᐃᑦ ᑎᑎᖅᑲᓗ ᐊᒃᑐᐊᖃᑎᒌᖕᓂᖏᓐᓂᒃ.
ᓄᓇᓖᑦ ᐊᑐᕐᓗᒋᑦ.
- ᓄᓇᓕᔅᓯ ᐅᖃᓕᒪᒐᖃᕐᕕᖃᖅᐸᑦ, ᐅᖃᓕᒫᒐᖃᕐᕕᖕᒨᖃᑎᒋᖃᑦᑕᕐᓗᒍ ᕿᑐᕐᖓᐃᑦ ᓂᕈᐊᖅᓯᑎᑉᐸᓪᓗᒋᑦ ᐅᖃᓕᒫᒐᕐᓂᒃ ᖃᐅᔨᔪᒥᓇᕆᔭᖏᓐᓂᒃ.
- ᓄᓇᓕᔅᓯᓐᓂ ᖃᓄᐃᓕᐅᖅᑐᖃᕌᖓᑦ ᐊᐃᖃᑎᒋᕙᓪᓗᒍ ᑐᓵᖃᑦᑕᕐᓂᐊᕐᒪᑕ ᑎᑎᖅᑭᕆᓂᕐᒥ ᓲᕐᓗ ᐅᓂᒃᑳᖅᑐᐊᖅᑐᖃᖅᑎᓪᓗᒍ ᐃᓕᖅᑯᓯᕐᒥᒃ ᓴᖅᑭᔮᖅᑎᑦᑎᔪᖃᖅᑎᓪᓗᒍ ᓲᕐᓗ ᐃᖖᒋᖅᑐᑦ, ᕿᓚᐅᔾᔭᖅᑐᑦ, ᐃᓄᐃᓪᓗ ᐱᙳᐊᕈᓯᖏᓐᓂᒃ ᓴᖅᑭᔮᖅᑎᑦᑎᑎᓪᓗᒋᑦ.
- ᐃᓚᔮᑎᑦ ᐱᖃᓐᓇᕆᔭᑎᓪᓗ ᐅᓂᒃᑳᕈᓐᓇᖅᑎᑉᐸᓪᓗᒋᑦ ᕿᑐᕐᖓᕐᓄᑦ.
ᓈᓴᐅᓯᕆᒋᐅᖅᓴᑎᑉᐸᓪᓗᒋᑦ ᐊᖏᕐᕋᒥ
ᓈᓴᐅᓯᕆᓂᖅ ᓈᓴᐅᑎᑐᐃᓐᓇᐅᖖᒋᒻᒪᑕ. ᐃᓚᖃᕐᒪᑦ ᐆᒃᑐᐃᓂᕐᒥᒃ, ᐃᓗᑦᑎᓂᒃ, ᐅᖓᓯᖕᓃᑦ ᐊᔾᔨᒌᖖᒋᓐᓂᖏᓐᓂᒃ, ᓴᓇᒻᒪᓕᖕᓂᓪᓗ. ᐊᔾᔨᒌᖖᒋᑦᑐᓂᒃ ᓈᓴᐅᓯᕆᔾᔪᑎᓂᒃ ᓈᒻᒪᒃᑐᓂᒃ ᑕᑯᒋᐊᖖᒐᖅᑎᑦᑎᔪᓐᓇᖅᐳᓯ ᐊᖏᕐᕋᒥᓗ ᐱᓕᕆᐊᖑᔪᓐᓇᖅᑐᓂᒃ ᐃᓕᓐᓂᐊᕆᐊᓚᐅᖅᓯᒪᖖᒋᑦᑐᓄᑦ ᖃᐅᑕᒫᑦ ᐱᓕᕆᐊᖑᕙᒃᑐᓂᒃ ᐱᖖᒍᐊᕐᓂᒃᑯᓪᓗ. ᐅᑯᐊ ᒪᓕᒃᑯᕕᒋᑦ:
- ᓂᕿᓂᒃ ᓈᓴᐃᖃᑎᒋᕙᓪᓗᒍ (ᓲᕐᓗ ᓯᕙᓛᑦ) ᐱᖖᒍᐊᑦ (ᑭᑉᐹᕆᒃᑐᑦ) ᕿᑐᕐᖓᐃᑦ ᓂᕆᑎᓪᓗᒍ ᐱᖖᒍᐊᖅᑎᓪᓗᒍᓘᓐᓃᑦ.
- ᑕᑯᓐᓇᖅᑎᑉᐸᓪᓗᒍ ᐃᓚᓯᕙᓪᓕᐊᓂᕐᒥ ᐃᓚᖖᒑᑎᕆᕙᓪᓕᐊᓂᕐᒥᒡᓗ ᓈᓴᐃᑎᓪᓗᒋᑦ ᓯᕗᒻᒧᑦ ᑭᖑᒧᓪᓘᓐᓃᑦ ᐃᓚᓯᓗᑎᑦ ᐲᔭᐃᑎᓪᓗᑎᑦᓗ ᐱᖖᒍᐊᓂᒃ.
- ᓈᓴᐅᑏᑦ ᑎᒃᑯᐊᖅᐸᓪᓗᒋᑦ ᓴᖅᑭᔮᖅᑐᑦ ᐃᒡᓗᓐᓂ ᓲᕐᓗ ᐅᖃᓕᒫᒐᕐᓂ, ᐅᓪᓗᖅᓯᐅᑎᓂᒃ, ᐅᖄᓚᐅᒻᒦᑦᑐᓂᒃ, ᐊᓯᖏᓐᓂᒡᓗ.
- ᕿᑐᕐᖓᐃᑦ ᐃᑲᔪᖅᑎᑉᐸᓪᓗᒍ ᓂᖅᑎᐅᖅᑎᓪᓗᒋᑦ ᐃᓚᒃᓴᖏᓐᓂᒃ ᐆᒃᑐᐃᑎᓪᓗᒍ.
- ᐅᖃᓪᓚᐅᑎᖃᖅᐸᓪᓗᓯᒃ ᓴᓇᒻᒪᓂᒃ ᑕᑯᔭᐅᒐᔪᒃᑐᓂᒃ ᐊᔾᔨᓯᕙᓪᓗᒋᑦ ᐃᒡᓗᒦᑦᑐᓄᑦ.
- ᐱᖖᒍᐊᓪᓗ ᓴᓇᒻᒪᖏᓐᓂᒃ ᑕᑯᑎᑉᐸᓪᓗᒋᑦ. ᓲᕐᓗ, ᐃᓗᑦᑎᓖᑦ ᐊᒥᐊᖏᓐᓂᒃ ᓴᓇᒻᒪᖏᓐᓂᒡᓗ.
- ᓈᓴᐅᓯᕆᓂᐅᑉ ᐅᖃᐅᓯᖅᑕᖏᓐᓂᒃ ᐊᑐᖅᐸᓪᓗᑎᑦ ᓲᕐᓗ ᐊᖏᔪᖅ/ᒥᑭᑦᑐᖅ, ᖃᓂᑦᑐᖅ/ᐅᖓᓯᑦᑐᖅ, ᑕᑭᔪᖅ/ᓇᐃᑦᑐᖅ ᐊᔾᔨᒌᖖᒋᓐᓂᖏᓐᓂᒃ ᑕᑯᒐᔪᒃᑕᖏᑕ ᖃᐅᔨᓂᐊᕐᒪᑦ.
- ᕿᑐᕐᖓᐃᑦ ᐋᖅᑭᒃᓱᐃᑎᑉᐸᓪᓗᒍ ᓲᕐᓗ ᐊᓐᓄᕌᓂᒃ ᐃᒧᓯᑎᓪᓗᑎᑦ (ᐊᓕᖅᓯᓂᒃ, ᐅᕕᓂᕈᕐᓂᒃ, ᖃᕐᓕᓂᒃ, ᐊᓯᖏᓐᓂᒡᓗ.) ᐱᖖᒍᐊᖏᓐᓂᒡᓗ ᐃᓕᐅᖅᑲᐃᑎᑉᐸᓪᓗᒍ ᓴᓗᒻᒪᖅᓴᐃᓕᕌᖓᑦ.
- ᕿᑐᕐᖓᐃᑦ ᖃᓄᖅᑑᖅᑎᑉᐸᓪᓗᒍ ᖃᐅᔨᓇᓱᐊᕐᓗᓂ. ᓲᕐᓗ, ᐊᒡᒍᐊᓕᕿᓵᖅᑐᕐᓂᐊᖅᐸᑦ ᐊᓘᑎᖃᖏᓪᓗᓂ, ᖃᓄᐃᒃᑲᔭᖅᐸ. ᐊᐃᒃᓯᕋᔭᖅᐸᓪᓚᐃᔪᖅ ᐃᓕᖕᓂᓪᓘᓐᓃᑦ ᐊᐃᒃᓯᖁᔨᒐᔭᖅᑐᖅ.
ᓄᓇᓕᖕᓂ ᐊᑦᑕᕐᓇᖅᑕᐃᓕᒪᓂᖅ
ᐅᕙᓂ ᓇᓂᓯᓂᐊᖅᐳᑎᑦ ᐅᑲᓕᖅ ᑲᓪᓚᓪᓗ ᐊᑭᓐᓇᕐᒥᐅᑕᕐᓂᒃ ᐊᔪᕆᖅᓲᔾᔨᔾᔪᑎᓂᒃ ᓄᓇᓕᖕᓂ ᐊᑦᑕᕐᓇᖅᑕᐃᓕᒪᓂᕐᒥᒃ ᑐᒃᑲᕆᐊᓕᒡᓗᑎᒃ, ᐊᐅᓪᓚᖅᓯᒪᓗᑎᒃ, ᐅᒥᐊᖅᑐᕐᓗᑎᓪᓘᓐᓃᑦ.
ᐱᓕᕆᔾᔪᑎᒃᓴᒃᑲᓐᓃᑦ
ᓄᓇᓕᖕᓂ ᒪᕐᕉᖕᓂᒃ ᐅᖃᐅᓯᓕᖕᓂᒃ ᐃᓕᓐᓂᐊᕐᓂᕐᒥᒃ ᑲᑐᔾᔨᖃᑎᒌᑦ (NBES) iᓄᓇᓕᖕᓂ, ᑮᓐᓇᐅᔾᔭᒃᓴᓇᓱᒃᑎᐅᖖᒋᑦᑐᑦ ᐱᔾᔪᑎᓖᑦ ᐸᐸᑦᑎᓂᕐᒥᒃ, ᓴᑉᐳᒻᒥᑦᑎᓂᕐᒥᒃ, ᓴᖅᑭᔮᖅᑎᑦᑎᓂᕐᒥᒡᓗ ᐃᓄᐃᑦ ᐅᓂᒃᑳᖏᓐᓂᒃ ᐊᑐᓚᐅᖅᑕᕕᓂᖏᓐᓂᒡᓗ, ᖃᐅᔨᒪᔭᖏᓐᓂᒃ ᐃᓕᖅᑯᓯᖅᑎᒍᑦ, ᐅᖃᐅᓯᕐᒥᒡᓗ. ᐃᓄᒃᑎᑑᖅᑐᑦ ᐊᒥᓱᐸᓘᒻᒪᑕ ᓱᕈᓯᖅᓯᐅᑎᑦ ᐅᖃᓕᒫᒐᐃᑦ ᐊᑭᖃᕐᓇᑎᒃ ᑐᖅᑯᕋᒃᓴᐃᑦ, ᐃᓚᒋᓪᓗᒍ Ukaliq and Kalla Go Fishing. ᐅᑲᓕᖅ ᑲᓪᓚᒡᓗ ᐃᖃᓪᓕᐊᖅᑑᒃ.
National Reading Campaign ᑲᓇᑕᓕᒫᒥ ᐅᖃᓕᒫᖅᑎᑦᑎᓇᓱᒃᑐᑦ ᑕᑯᓐᓇᖖᒍᐊᕐᒪᑕ, ᐃᓅᖃᑎᒌᓂᒃ ᐅᖃᓕᒫᖅᑎᐅᑎᑦᑎᓇᓱᖕᓂᕐᒥᒃ ᐃᓅᓯᓕᒫᖅ.
Illitaqsiniq ᐃᓕᑕᖅᓯᓂᖅ ᓴᖅᑭᔮᖅᑎᑦᑎᖕᒪᑕ ᑎᑎᖅᑭᕆᓂᕐᒥᒡᓗ ᐃᑲᔪᖅᓱᖅᑐᑎᒃ ᓄᓇᕗᒻᒥ ᐅᖃᐅᓯᖅᑕᕆᔭᐅᔪᓂᒃ ᓄᓇᓕᖕᓂᓪᓗ ᐱᕚᓪᓕᖅᑎᑦᑎᓇᓱᖕᓂᕐᒥᒃ.
It Starts at Home ᐊᖏᕐᕋᒥ ᐱᒋᐊᖅᑐᖅ ᐃᓚᔮᕇᓄᑦ ᐱᓕᕆᐊᒃᓴᖅ ᓄᓇᕗᒻᒥ ᐃᓕᓐᓂᐊᕐᕕᖕᓄᑦ.
Inhabit Media iᐃᓐᕼᐋᐱᐅᑦ ᒦᑎᐊ ᐃᓄᖕᒧᑦ ᓇᒻᒥᓂᕆᔭᐅᔪᖅ, ᐅᖃᓕᒫᒐᓕᐅᖅᑎᑦ ᑲᓇᑕᐅᑉ ᐅᑭᐅᖅᑕᖅᑐᖓᓃᑦᑐᖅ, ᓴᖅᑭᔮᖅᑎᑦᑎᓇᓱᐊᖅᑐᑦ, ᐸᐸᑦᑎᓪᓗᑎᒡᓗ ᐅᓂᒃᑳᓂᒃ, ᖃᐅᔨᒪᔭᐅᔪᓂᒃ, ᐊᔪᖖᒋᑕᐅᔪᓂᒡᓗ ᑲᓇᑕᐅᑉ ᐅᑭᐅᖅᑕᖅᑐᒥᐅᑕᖏᓐᓄᑦ.
ᐊᓯᖏᑦ ᑐᖅᑯᕋᒃᓴᑦ
ᐅᖃᐅᓯᑦ ᐱᖖᒍᐊᕈᑏᑦ ᐃᓄᒃᑎᑑᖅᑐᖅ ᑐᖅᑯᒐᖅ ᓱᕈᓯᓛᓄᑦ ᐊᑐᐃᓐᓇᐅᑎᑦᑎᔪᖅ ᖁᕕᐊᓇᖅᑐᓂᒃ ᐱᓕᕆᐊᖑᔪᓐᓇᖅᑐᓂᒃ ᐃᓕᓴᖅᓯᔪᓐᓇᖅᓯᓂᕐᒥᓪᓗ ᓴᓇᒻᒪᓕᖕᓂᒃ ᓂᐱᓂᒡᓗ, ᐅᖃᐅᓯᕐᓂᒡᓗ ᐃᓕᑦᑎᕙᓪᓕᐊᓂᕐᒥᒃ.
ᑐᖅᑯᕈᒃ ᐅᕙᖖᒐᑦ iTunes ᐊᒻᒪᓗ Google Play Store!
ᑎᑎᕋᕆᐅᖅᓴᐅᑎ ᐃᓄᐃᑦ ᐅᖃᐅᓯᖏᓐᓂᒃ ᐃᓕᓐᓂᐊᕈᑎ ᑐᖅᑯᒐᖅ ᓱᕈᓯᕐᓂᒃ ᖁᕕᐊᓇᖅᑐᓂᒃ ᐱᓕᕆᐊᖑᔪᓐᓇᖅᑐᓂᒃ ᑎᑎᖅᑲᓂᒡᓗ ᓂᐱᖏᓐᓂᒃ ᑕᑯᑎᑦᑎᔾᔪᑎ ᑎᑎᕋᕆᐅᖅᓴᓂᕐᒥᒡᓗ.ᑐᖅᑯᕈᒃ ᐅᕙᖖᒐᑦ iTunes ᐊᒻᒪᓗ Google Play Store!